Xa vai chegar o qué...?

En Galifontes, o Wikisource en galego.
Saltar ata a navegación Saltar á procura


Xa vai chegar o qué...?(Con anacos do meu interior)       Manuel Antonio       1920
 


    Xa virá!
    A sorrisa nos beizos é inconsciente
    E nos ollos a brancura do horizonte
    O corazón latexa
unha armonía porvirista quente
    Xa vai chegar!
                 O qué...?
                          Xa vai chegar!


    Xa virá!
    Pola testa engurrada
escorrega o peso das Eternidades
    sondexar cos ollos no horizonte fuxitivo
    I o son do corazón
                   bazado
    morre no peito unha morte de soedades
    Xa vai chegar!
                 O qué...?
                          Xa vai chegar!


    Xa virá!
    Outra hora perde a Vida
nas mans do Valdeiro
                   coma si fora vento
    Loce no horizonte o loceiro de serán
como si aboiando viñese vindo lento
    Xa vai chegar!
                 O qué...?
                          Xa vai chegar!


    Xa virá!
    Na loita dos días
hai unha Paz
            ás veces
                    no horizonte
    Corazón!
            Latexa aquelas armonías
porque xa vai chegar!
                 O qué...?
                           Xa vai chegar!


<<<< >>>>