Proel/Misa da mañán
< Proel
MISA DA MAÑAN
Cinguen anelos ridentes
nos dediños da mañán,
toda de branco vestida,
pois vaise casar có mar,
as campanas da parroquia,
vella madriña aldeán.
Os milleiros se axionllan
n'unha devota oración,
qu'antr-o berce das montanas
vai nacer o novo sol.
O vello rio da aldea,
madrugador e gaiteiro,
trenqueando os brancos zocos
vai a misa co luceiro.
Pol-os campos perguiceiros,
a baldada campaíña
bautiza a alma da paisaxe
con choiva d' auga bendita.
Os verdes campos sensuales
fuman o opio do día.